హర్షవనం

సినీ రంగంలో రజతోత్సవం జరుపుకుంటున్న ఆత్మీయుడు శేఖర్‌ కమ్ముల ‘కుబేర’ టీజర్‌ చూడగానే మా చిన్నప్పుడు బెల్లం కాసే వాళ్లు పాకం మధ్యలో ఠంగున పళ్ళానికి కొట్టే పిల్లల ఉడుకు బెల్లం తాయిలం అంత ఊరించింది. ఆపుకోలేక మొదటి రోజు మొదటాటకే మా అబ్బాయి తేజ వెంటబడి హాల్లోకి చేరాం.

తెలుగు సినిమా అంటేనే మసాలా ఎక్కువ కూర తక్కువ. ‘కుబేర’ సినిమా గడిచేకొద్ది మసాలా వాసన తగ‌లకపోగా, స్విట్జర్లాండ్‌, ప్యారిస్‌ లొకేషన్లు లేవు, కాస్ట్యూమ్స్‌ ఛేంజ్‌ పాటల్లేవు, కనీసం ఐటం సాంగూ లేదు. హీరోయిన్‌ జఘన తలంపై కాంగో డ్రమ్స్‌ లేవు, హీరోల వరస నరుకుళ్ళు, కొడితే కరెంట్‌ వైర్లకు తగిలే శివకాశి ఫైర్‌ వర్క్స్‌ లేవు. ఇవేమీ లేకపోగా మన్మధుడు, కింగ్‌ నాగార్జునను డీ గ్లామరస్‌ గా ఫక్తు ఫ్యామిలీ మ్యాన్‌ (కనీసం కింగ్‌ ఫాన్స్‌ అంటే కించిత్‌ భయం లేకుండా) స్థాయికి దించేశాడు. ఇది చాలదన్నట్లు గ్లామర్‌ గర్ల్‌ రష్మిక ముఖానికి పావుసేరు ఆముదం పామేసి ‘రాజా’ మాయలోపడి లేచిపోయేంతగా మార్చేశాడు. పోన్లే పాపం అని ఓపికతో చూస్తున్నాం కదా అని మ‌రింత‌ స్పీడు పెంచి ఏకంగా బిచ్చగాడినే హీరోని చేసేశాడు. సినిమాలో పావు భాగం గార్బేజ్‌ గుట్టలో తీయడం, నేషనల్‌ క్ర‌ష్‌ని చెత్తబుట్టలో క్ర‌ష్‌ చేసి దొర్లించడం నిజంగా దుస్సాహాసమే. యాభైల్లో పడ్డ శేఖర్‌ సినీ రంగంలో ఇరవై ఐదేళ్లు నిండిన సాహస బాలుడే. సామాజిక బాధ్య‌త‌ను, విలువ‌ల్ని మ‌రువ‌ని ధీరుడే

వాస్తవానికి ‘కుబేర’ సినిమా కథలో ప్రత్యేకత ఏమీ లేదు. అనునిత్యం మన నిజ జీవితంలో ప్రస్తుతం అన్నీ దేశాల్లో జరుగుతున్నదే. ఒక దేశంలో ఎలానో మస్కా అయితే మరో దేశంలో కంబానీలో, వదానీలో. Just names change, modus operandi same.. రాజకీయ నాయకుల, అధికారుల కృారమైన స్కాములు చెప్పడంలో ఫ్రెష్నెస్‌, సంభాషణల్లో పట్టు శేఖర్‌ మాత్రమే ఇవ్వగల వేల్యూ ఎడిషన్‌. సినిమా ఆరంభంలో లక్ష కోట్లకు ఆయిల్‌ అమ్మే డీల్‌ క్లైమాక్స్‌ లో తారుమారైతే చివరకు ఆవు వ్యాసంలా మళ్లీ లక్ష కోట్లు ఇవ్వండి మీకంతా ఇచ్చేస్తాం అని సిద్దప్ప అనడం ‘కనకపు సింహాసనమున శునకమును కూర్చుండ బెట్టిన వెనకటి గుణమేల మాను’ అన్న సుమతీ శతక‌కారుడ్ని గుర్తు చేస్తుంది.

సినిమాలో బిచ్చగాడి పాత్రలో అత్యంత సహజంగా జీవించిన ధనుష్‌ (దేవ) పాత్ర నాజీ concentration క్యాంప్‌ నుంచి బయటపడి ‘జీవితం జీవించడం కోసమే’ అని తన The Meaning of life పుస్తకంలో విక్టర్‌ ఫ్రాంకెల్‌ చెప్పిన జీవిత సత్యాన్ని ధ్వనింప చేస్తుంది. దేవ rustic innocence ను చివరి వరకు అలాగే కాపాడుకుని సాటి బిచ్చగాడి అంత్యక్రియలు కట్టెలతో జరగాలనడంలో, నేను చనిపోయిన పర్వాలేదు దేశంలో బిచ్చగాళ్ల జీవితం బాగుపడాలని తాపత్రయపడటంలో అది మరింత హైలైట్‌ అయ్యింది.

నారాయణ మంత్రం నలుగురికి చెప్తే నరకానికి పోతావన్న గురువు మాటలు లెక్కపెట్టని సమతావాది
శ్రీ రామనుజాచార్యులను దేవాకీ ఆదర్శం చేసిన శేఖర్‌ కమ్ములకు kudos. బిచ్చగాళ్లకు వేషం మార్చి తీసుకెళ్లినప్పుడు pristine innocence తో ‘మా కిడ్నీలు, వేళ్ళు తీసేసుకుంటారా సార్‌’ అని అడగడం మన కమర్షియల్‌ సమాజం సామాన్యులను సైతం ఏ మేరకు కండీషనింగ్‌ చేసేసిందో తెలుస్తుంది. బిచ్చగాళ్ళను తమ పని అయ్యేవరకు పందెం కోళ్లను జీడిపప్పు పెట్టి మరీ మేపినట్లు వాళ్లకు బిర్యానీలు పెట్టించడం స్వార్థ కారుణ్యమే. నాగరికత వెర్రితలలు వేస్తున్న ఈ కాలంలో ఆగర్భ శ్రీమంతుల అద్దె గర్భాలు మోసే గర్భ దరిద్రులను (వారు మోస్తున్న రిచ్‌కిడ్స్‌ డెలివేరి అయ్యే వరకు) అపురూపంగా చూసుకోవడం స్వలాభం కోసమే.

CBI ఆఫీసర్‌ దీపక్‌ పాత్రగమనం చూస్తే గోపీచంద్‌ రాసిన ప్రఖ్యాత నవల అసమర్ధుని జీవ యాత్రలోని మొదటి వాక్యమే గుర్తొస్తుంది. ‘’సీతారామారావు జీవితం విచిత్రమైంది. ఉన్నత శిఖరాగ్రం నుంచి స్వచ్ఛమైన జలంతో భూమి మీద పడి, మలినాన్ని కలుపుకొని, మురికి కూపంలోకి ప్రవహించే సెలయేటిని జ్ఞప్తికి తెస్తుంది.’’ నిజాయితీ పరుడైన దీపక్‌ జైలు పాలై వ్యవస్థ మీద నమ్మకం పోయి నిస్సహాయతతో బలహీన క్షణాన తప్పుదారి పడతాడు. కొంత దూరం ప్రయాణించిన తర్వాత తన తప్పు సరిదిద్దుకోవాలనుకుంటాడు. దీపక్‌ మానసిక సంఘర్షణలో చివ‌ర‌కు మానవత్వం, మంచితనమే జయిస్తుంది. If you move away from your true Self, you will suffer more అనే వాస్తవానికి దీపక్‌ పరివర్తనే కారణం. ఇటువంటి పాత్రను నాగార్జున అంగీకరించి మెప్పించడం గొప్పే. వీల్‌ ఛైర్‌కు పరిమితమైపోయిన పాత్రకైనా ఊపిరులూదే మరో సాహిసి నాగ్‌.

సినిమా క్లైమాక్స్‌ లో దేవాకు చిన్నతనంలో అండగా నిలిచిన ఓబులేసన్నను నేనే అని హామీ ఇచ్చి కాపాడటం పశ్చాత్తాప హృదయంతో తను నమ్ముకున్న వాళ్లకోసం ప్రాణాలు అర్పించేంతగా పరిణితి చెందడమే.

రష్మిక మిడిల్‌ క్లాస్‌ అమ్మాయిగా బాగా కుదురుకుంది. దేవా పట్ల పెరుగుతున్న కోపం, అసహనపు షేడ్స్‌ను బాగా పలికించింది. ఇంత క్రైసిస్‌లో హ్యాండ్‌ ఇచ్చిన ‘రాజా’ ను మరువని సమీర అమాయకపు జీవే. శేఖర్‌ కమ్ముల మెగాస్టార్‌ చిరంజీవికి మెగా ఫ్యాన్‌. అందుకే ‘చూడాలని ఉంది’లో వెర్రిబాగుల సౌందర్య ‘కోడి’ రక్తంతో ప్రేమలేఖ రాసిన తన ప్రియుడు రాజు గురించి చెప్తే… మన శేఖర్‌ అదే రాజును సమీరకు కొనసాగించారు. దేవాతో ఉండలేక, అతని మానాన అతన్ని వదల్లేక మథనపడటం ఆమె మంచితనమే. సమీర ఓల్డ్‌ మాంక్‌ కోడ్‌ చెప్పి తాళం అడగ్గానే సెక్యూరిటీ వాడు పిచ్చి చూపులు చూడటం, రాజు కోసం కొన్న పెళ్ళి డ్రస్‌ దేవాకు ఇచ్చేయడం, కుబేరుడు బిచ్చమెత్తుకుంటూ లాఠీ దెబ్బలు తినడం సినిమాలో ట్రాజీ కామెడీలు.

ఎక్కడి నుంచి పట్టుకొచ్చాడో కాని ‘కుబేర’ విలన్‌ చాలా గ్లామరస్‌. వాడి బుద్ధి మాత్రం మమ్ముల్ని అడగొద్దు. సినిమా చూస్తే మీకే అర్దమవుతుంది. వాడికి మనిషి ప్రాణాలంటే నథింగ్‌. కొంతమంది పోతే dead weight పోయినట్లు దేశానికి బరువు తగ్గుతుంది అని నమ్మే రకం. వాడు ఎలాంటి జాలి, దయ, కరుణ లేని కరుడు కట్టిన క్యాపిటలిస్ట్‌. పాపం వాళ్ళ నాన్నమాత్రం వింటేజ్‌ విలన్‌. తప్పు చేస్తున్నా, కొంత పాప భీతితో, భయంతో, మాటిమాటికీ వెంకన్నకు వజ్రాల కిరీటం లంచంగా బంపర ఆఫర్‌ ఇవ్వచూపుతాడు.

మంత్రి సిద్ధప్పకు విలన్స్‌తో మాట్లాడేప్పుడు ప్రెస్‌, మీడియా, రాబోయే ఎలక్షన్లే సమస్య కానీ పోయే ప్రాణాలు, దేశ సంపద మీద ఏ మాత్రం దృష్టి లేదు. విలన్‌బాబు with more advanced features తో పాపం, పుణ్యం, నరకం, దయ వంటి గుణాలు డిసేబుల్‌ చేసేసిన‌ వెర్షన్‌. తండ్రి, కొడుకుల పాత, కొత్త విలనీల కాంట్రాస్ట్‌ చాలా బాగుంది.

DSP సంగీతం అద్భుతం. గుడిలో అన్నమయ్య కీర్తనలు, బొంబాయి మసీదులో సూఫీ పాటలు, మేడ మీద నుండి దేవా తాడు లేకుండా బంగి జంపింగ్‌ చేసేప్పుడు ‘నడిపించు నా నావ నడిసంద్రమున దేవా’ క్రైస్తవ కీర్తన బ్యాక్‌ గ్రౌండ్‌ స్కోర్‌ సెక్యులర్‌గా వినిపించి వందకి వంద స్కోర్‌ కొట్టేశాడు. సినీ విశ్వకర్మ తోట తరణి గారు ఇంద్రజాలంతో ఏది గుడో, ఏది సెట్టింగ్‌ తెలియనంత భ్రమలో పడేసారు. గోడమీద ధర్మో రక్షతి రక్షితః ఆర్యోక్తి బిచ్చగాళ్ళ సంభాషణకు మ్యాచింగ్‌ బ్యాక్‌ డ్రాప్‌.

‘కుబేర’లో శేఖర్‌ కమ్ముల ప్రతిపాదించిన జీవిత సత్యాలు… దురాశ దుఃఖానికి చేటు, కృతజ్ఞత గొప్ప గుణం. దేవుడికి వజ్రాల కిరీటాలిచ్చినా విలన్లకు వర్కౌట్‌ అవ్వదు. దీపక్‌ జీవితం స్వధర్మే నిధనం శ్రేయః పరధర్మో భయావహ, Be true to yourself to be happy and peaceful. ఇవి చాలవా అండీ కుబేర మంచి సినిమా అనడానికి! నిడివి కాస్త ఎక్కువ అనిపించడం ఒక్కటే నాకు అనిపించిన చిన్న లోపం.

ఆకలి రాజ్యం సినిమాలో కమలహాసన్‌ తన ఫోటో గార్బేజ్‌లో వెదుక్కుని చెత్తలో దొరికిన చిత్రరత్నం అన్నట్లు కుబేర నిజంగానే చెత్త నుండి మ‌లిచిన‌ చిత్ర రాజ‌మే.

గ‌డ్డం పెంచేసుకుని, ఆరేడు కేజీల బరువు తగ్గి మరీ (అసలే శేఖరులు ఫెదర్‌ లైట్‌) సాహసం సేయరా రాకుమారి సిద్దిస్తుందన్నంత intense passion తో ‘కుబేర’ తీస్తే, రాకుమారి సిద్ధించకపోయినా బుద్ధి విక‌సింప చేసుకునేందుకైనా మనం ఒక చూపు చూస్తే పోలా!